(ភ្នំពេញ)៖ បន្ទាប់ពីបានបង្កើតឱ្យមានការខឹងសម្បារយ៉ាងខ្លាំងពីសំណាក់សាធារណជន ជុំវិញករណីក្រុមក្មេងទំនើងអាងខ្លួនជា «កូនខ្លារបស់សមត្ថកិច្ច» បានជិះម៉ូតូដេញធាក់ និងវាយប្រហារយ៉ាងសាហាវឃោរឃៅលើក្មេងស្ទាវពីរនាក់ឱ្យរងរបួសធ្ងន់រហូតប្រកាច់ នៅល្ងាចថ្ងៃទី២៨ ខែកក្កដា ឆ្នាំ២០២៦ នេះ កម្លាំងកងរាជអាវុធហត្ថរាជធានីភ្នំពេញ បានចុះស្រាវជ្រាវ និងធ្វើការឃាត់ខ្លួនមេខ្យល់ម្នាក់ ឈ្មោះ រតនៈ ពិសាល យកមកចាត់ការតាមផ្លូវច្បាប់ជាផ្លូវការហើយ។
យោងតាមរបាយការណ៍ផ្លូវការពីកងរាជអាវុធហត្ថរាជធានីភ្នំពេញ បានឱ្យដឹងថា ជនសង្ស័យដែលត្រូវឃាត់ខ្លួនមានឈ្មោះ រតនៈ ពិសាល អាយុ ១៧ឆ្នាំ មានមុខរបរមិនពិតប្រាកដ។ បុគ្គលរូបនេះ គឺជាមុខសញ្ញាដែលបានអះអាងក្តែងៗថា ខ្លួនជា «កូនខ្លារបស់សមត្ថកិច្ច» ហើយបានដឹកនាំបក្ខពួកដេញតាមធាក់ម៉ូតូ និងប្រើហិង្សាយ៉ាងព្រៃផ្សៃលើយុវជនពីរនាក់ បណ្តាលឱ្យដួលប្រកាច់លើទ្រូងផ្លូវ កាលពីយប់រំលងអធ្រាត្រ ឈានចូលថ្ងៃទី២៦ ខែកក្កដា ឆ្នាំ២០២៦ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ព្រឹត្តិការណ៍នេះ បានចោទជាសំណួរយ៉ាងក្តៅគគុកនៅក្នុងចំណោមមហាជន និងអ្នកតាមដានសង្គម ៖ «តើហេតុអ្វីបានជាក្រុមក្មេងទំនើងទាំងនេះ ហ៊ានដើរប្រកាសខ្លួនថាជា កូនខ្លារបស់សមត្ថកិច្ច យ៉ាងរលូនបែបនេះ? តើពិតជាមានមន្ត្រីសមត្ថកិច្ចណាម្នាក់នៅពីក្រោយខ្នង ធ្វើជា មេខ្លា កាងកម្ទេចច្បាប់ និងផ្តល់ភាពអនាមិកដល់ក្មេងទំនើងទាំងនេះមែនឬយ៉ាងណា?»
ការដែលក្រុមក្មេងទំនើងដើរអាងខ្នងសមត្ថកិច្ច យកអំណាចមកធ្វើបាប និងកាប់ចាក់ប្រជាពលរដ្ឋស្លូតត្រង់ គឺជាអំពើបំផ្លិចបំផ្លាញកិត្តិយស និងកិត្យានុភាពរបស់កងកម្លាំងប្រដាប់អាវុធជាតិទាំងមូល។ មហាជនបានរំលឹក និងអំពាវនាវឱ្យសមត្ថកិច្ចជាន់ខ្ពស់ អនុវត្តតាមអនុសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី គឺការ «សម្អាតផ្ទះយើង» និង «សម្អាតចកចេញពីបឹង»។
ប្រសិនបើតាមរយៈការស្រាវជ្រាវ ពិនិត្យឃើញថាមនុស្សក្នុងជួរកងកម្លាំងសមត្ថកិច្ចណាម្នាក់ ពិតជាបានធ្វើខ្លួនជា «មេខ្លា» ចែកខ្នង បង្កើតបក្ខពួក ឬកពារក្មេងទំនើងទាំងនេះមែននោះ អាជ្ញាធរមានសមត្ថកិច្ចត្រូវតែចាត់វិធានការវិន័យ និងផ្លូវច្បាប់យ៉ាងម៉ឺងម៉ាត់បំផុត ដោយគ្មានការយោគយល់ ឬយោគយល់មុខមាត់ឡើយ ដើម្បីវះកាត់សាច់ស្អុយ និងស្តារទំនុកចិត្តរបស់ប្រជាពលរដ្ឋចំពោះច្បាប់ និងសន្តិសុខសង្គមឡើងវិញ៕
About the Author
