រដ្ឋបាលស្រុកត្រាំកក់ បើកកិច្ចប្រជុំបិទផ្សាយជាសាធារណៈនូវឯកសារនៃការវិនិច្ឆ័យដីធ្លី ក្នុងឃុំអូរសារាយ
[ស្រុកត្រាំកក់]៖ នៅព្រឹកថ្ងៃព្រហស្បតិ៍ ៦កើត ខែពិសាខ ឆ្នាំមមី អដ្ឋស័ក ព.ស. ២៥៦៩ ត្រូវនឹងថ្ងៃទី២៣ ខែមេសា ឆ្នាំ២០២៦ នេះ លោក កេត ម៉ៅ អភិបាលនៃគណៈអភិបាលស្រុកត្រាំកក់ បានអញ្ជើញជាអធិបតីក្នុងពិធី «ប្រជុំបិទផ្សាយជាសាធារណៈ នូវឯកសារនៃការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ» ដែលប្រព្រឹត្តទៅនៅក្នុងភូមិដំណាក់ខ្លុង ឃុំអូរសារាយ ស្រុកត្រាំកក់។
ក្នុងពិធីដ៏មានសារៈសំខាន់នេះ ក៏មានការអញ្ជើញចូលរួមពីសំណាក់៖
លោកប្រធានការិយាល័យ និងអង្គភាពពាក់ព័ន្ធជុំវិញស្រុក។
លោកស្រីមេឃុំស្តីទី និងក្រុមប្រឹក្សាឃុំអូរសារាយ។
លោកមេភូមិ ចាស់ព្រឹទ្ធាចារ្យក្នុងមូលដ្ឋាន។
បងប្អូនប្រជាពលរដ្ឋម្ចាស់ក្បាលដីជាច្រើនរូប។
គោលបំណងនៃការបិទផ្សាយ
ការបិទផ្សាយជាសាធារណៈនូវឯកសារនៃការវិនិច្ឆ័យនេះ គឺជាដំណាក់កាលយ៉ាងសំខាន់ក្នុងកិច្ចដំណើរការចុះបញ្ជីដីធ្លី ដើម្បី៖
ផ្ទៀងផ្ទាត់ទិន្នន័យ៖ ទុកឱកាសឱ្យម្ចាស់ដីពិនិត្យឈ្មោះ ស្ថានភាពគ្រួសារ និងទំហំក្បាលដីឱ្យបានត្រឹមត្រូវ។
ដោះស្រាយវិវាទ៖ បង្កលក្ខណៈឱ្យមានការតវ៉ា ឬការកែតម្រូវក្នុងករណីមានកំហុសឆ្គងបច្ចេកទេស មុននឹងឈានទៅដល់ការចេញប័ណ្ណកម្មសិទ្ធិ (ប្លង់រឹង) ជាស្ថាពរ។
តម្លាភាព៖ ធានាថាការចុះបញ្ជីដីធ្លីត្រូវបានធ្វើឡើងដោយត្រឹមត្រូវតាមច្បាប់ និងមានការដឹងឮពីគ្រប់ភាគីពាក់ព័ន្ធ។
ប្រសាសន៍សំណេះសំណាល
ក្នុងឱកាសនោះ លោក កេត ម៉ៅ អភិបាលស្រុក បានមានប្រសាសន៍កោតសរសើរដល់ក្រុមការងារចុះបញ្ជីដីធ្លី និងអាជ្ញាធរឃុំ-ភូមិ ដែលបានខិតខំបំពេញភារកិច្ចកន្លងមក។ លោកក៏បានដាស់តឿនដល់បងប្អូនប្រជាពលរដ្ឋដែលមានក្បាលដីក្នុងភូមិដំណាក់ខ្លុងទាំងអស់ សូមអញ្ជើញមកពិនិត្យទិន្នន័យឱ្យបានច្បាស់លាស់ក្នុងរយៈពេលកំណត់ ដើម្បីជៀសវាងបញ្ហានៅថ្ងៃក្រោយ។
ប័ណ្ណកម្មសិទ្ធិដីធ្លី គឺជាឯកសារគតិយុត្តិដ៏សំខាន់ដែលធានានូវសិទ្ធិម្ចាស់ដីស្របច្បាប់ ការពារការរំលោភបំពាន និងបង្កលក្ខណៈងាយស្រួលដល់ការប្រើប្រាស់ដីធ្លីជាទ្រព្យសកម្មសម្រាប់អភិវឌ្ឍជីវភាពគ្រួសារ។
សេចក្តីរាយការណ៍ដោយ៖ ក្រុមព័ត៌មានមូលដ្ឋានស្រុកត្រាំកក់
About the Author
